به ناوی خوای به‌خشنده‌ی میهره‌بان
به‌ڕێزان له که‌مپه‌ینی به‌رگریی له زیندانییانی سیاسیی نه‌ته‌وه‌کانی ئێران!
به درێژایی ته‌مه‌نی پڕ له نه‌گبه‌تیی به‌نێو کۆماری ئیسلامیی و به درێژایی ته‌مه‌نی پڕسه‌روه‌ریی خه‌بات و تێکۆشان، ئازاترین ڕۆڵه‌کانی کورد و گه‌لانی ئێران چاونه‌ترسانه بە لۆژیک و زمان و قه‌ڵه‌م به‌گژ دەسەڵاتدارانی سته‌مکاری ئێران و ده‌سته‌ودایه‌ره گۆپاڵبه‌ده‌سته‌کانیاندا چوونه‌وه و له ڕێگای چوون به‌ره‌و زینداندا هه‌موو خۆشیی و جوانییه‌کانی ژیانیان له‌ده‌ستداوه و به‌ها به‌رزه‌کانیان بۆخۆیان ده‌سته‌به‌رکردووه. زیاتر له سی ساڵه چاڵه‌ڕه‌شه تاریکه‌کانی ئێران پڕن له بیر و زه‌ینی ڕوون و زمانی تیژ و چاوی کراوه، ناوبه‌ناویش بۆ سڕینه‌وه‌ی ئه‌و مرۆڤه خاوه‌ن بیر و هه‌ڵوێستانه ...
له سه‌ر گۆڕه‌پانی تێکۆشان و بۆ چاوترسێنکردنی کۆمه‌ڵانی وه‌زاڵه‌هاتوو به تاک و کۆمه‌ڵ لێیان له‌داردراوه و به په‌تی بێدادیی هه‌ڵواسراون.
له سه‌ر گۆڕه‌پانی تێکۆشان و بۆ چاوترسێنکردنی کۆمه‌ڵانی وه‌زاڵه‌هاتوو به تاک و کۆمه‌ڵ لێیان له‌داردراوه و به په‌تی بێدادیی هه‌ڵواسراون.
سه‌ره‌ڕای پڕۆتستۆ و مه‌حکومکردنی ئه‌و کرده‌وه زاڵمانانه‌ی ده‌سه‌ڵاتی تاران له‌لایه‌ن کۆڕ و کۆمه‌ڵ و که‌سایه‌تیی رۆشنبیر و ئایینیی و حقوقیی ناوه‌وه و ده‌ره‌وه و ئێرانیی و غه‌یره‌ئێرانیی، ئه‌م ڕه‌وته درێژه‌ی پێدراوه و سه‌رانی ده‌سه‌ڵات گوێیان بۆ هیچ سکاڵا و هه‌ڕه‌شه‌یه‌ک نه‌گرتووه و ده‌ستیان له‌و تاوانانه هه‌ڵنه‌گرتووه.
ئێستا که کۆمه‌ڵێک تێکۆشه‌ری بواری خەبات بۆ مافی زیندانییانی سیاسیی له ئاستی نه‌ته‌وه‌کانی ئێران هه‌وڵه‌کانیان خستۆته‌گه‌ڕ بۆ پێشگرتن له‌م پێشێلکارییه ئاشکرایانه‌ی مافی مرۆڤ و بۆ ئه‌و مه‌به‌سته که‌مپینێکیان وه‌ڕێخستووه، جێی خۆیه‌تی له‌لایه‌ن هه‌موو ناوه‌نده مرۆڤدۆست و مافپه‌روه‌ره‌کانه‌وه پاڵپشتیی بکرێن، تا به هەوڵ و سەنگی هه‌موو لایه‌ک بتوانن ده‌نگی که‌ساسیی و مه‌زڵوومیی ئه‌و توێژه مافزەوتکراوە له کۆمه‌ڵگە بگه‌یه‌ننه ناوه‌نده بڕیاربه‌ده‌ست و مافپارێزه نێودەوڵەتییەکان و سزای ئیعدام بۆ زیندانییانی سیاسیی و تێکۆشه‌رانی مافی مرۆڤ له ئێرانی ژێر دەسەڵاتی ئەو ڕژیمە، هه‌ڵبگیرێ.
ئێمه له ڕێکخراوی خه‌بات،ی شۆڕشگێڕی کوردستان که هەم وه‌ک رێکخراو و هەمیش وه‌ک نه‌ته‌وه پشکی زۆری ئه‌و زێف و ئازارانه‌مان به‌رکه‌وتووه و به سه‌دان و بگره به هه‌زاران رۆڵه‌ی تێکۆشه‌رمان له‌و قوژبنه تاریکانه‌دا له ده‌ستداون، ده‌ستخۆشیی له هه‌موو ئه‌و تاک و کۆمه‌ڵانه ده‌که‌ین که له‌و بواره خوڕێن و حه‌سته‌مه‌دا هه‌نگاوهه‌ڵدێننه‌وه و بۆ پارێزگاریی له ژیانی که‌سانی دیکه ژیان له خۆیان تاڵ ده‌که‌ن و، به هه‌ر شێوه‌یه‌کی گونجاو پاڵپشتیی خۆمان لە خەباتی ڕاگەیەندراوی (که‌مپه‌ینی به‌رگریی له زیندانییانی سیاسیی نه‌ته‌وه‌کانی ئێران) ده‌رده‌بڕین.
هیوادارین بەهیممەتی هەموو لایەك ئه‌م هه‌وڵانه بگه‌نه ئه‌نجامی باش و دڵخۆشکه‌ر و ببنه هۆی پته‌وبوونه‌وه‌ی پێوه‌ندیی مرۆڤدۆستانه‌ی نەتەوەکانی ژێر دەسەڵاتی ڕژیمی ئێران.
ڕێکخراوی خه‌بات،ی شۆشگێڕی کوردستان
کومیته‌ی ناوه‌ندیی
١٨ی ڕەشەمەی ١٣٨٩ی کۆچیی – هەتاویی
٩/٣/٢٠١١ی زایینیی
